15 მარტს, ევროპის სახლში, ევროკავშირის მიერ დაფინანსებული პროექტის „თვითმმართველობის განვითარების ხელშეწყობა საქართველოში“ ფინალური ღონისძიება გაიმართა. პროექტს სამი წლის განმავლობაში სამოქალაქო საზოგადოების ინსტიტუტი ახორციელებდა რეგიონულ პარტნიორებთან ერთად. შეხვედრას ესწრებოდნენ ევროკავშირის წარმომადგენლობის ხელმძღვანელი, ელჩი ფილიპ დიმიტროვი; ატაშე ოლივერ რაისნერი; რეგიონული განვითარებისა და ინსფრასტრუქტურის მინისტრის მოადგილე, მამუკა ვაწაძე; რეგიონული პარტნიორები, თვითმმართველობების წარმომადგენლები და ა.შ.
შეხვედრაზე სტუმრებმა თვითმმართველობის არსზე და მმართველობის სხვა ფორმებთან შედარებით მის უპირატესობაზე ისაუბრეს. რეგიონული განვითარებისა და ინფრასტრუქტურის მინისტრის მოადგილემ, თავის მხრივ, ხაზი გაუსვა რეგიონული განვითარების მნიშვნელობას ზოგადად ქვეყნის განვითარების საქმეში, ელჩმა კი აღნიშნა, რომ ადგილობრივი თვითმმართველობა უნდა ეფუძნებოდეს ადგილობრივი მოსახლეობის ინტერესებს. თვითმმართველობის განვითარების ხელშეწყობის პროექტის მთავარი კომპონენტები იყო: თვითმმართველობის, საზოგადოებისა და არასამთავრობო სექტორის თანამშრომლობისთვის ინსტიტუციური მექანიზმების შექმნა, თვითმმართველობების დიალოგი მოსახლეობასთან და საზოგადოების გააქტიურება.
პროექტი საქართველოს 4 რეგიონში, კახეთში, შიდა ქართლში, გურიასა და აჭარაში ხორციელდებოდა. პროექტის ფარგლებში შეირჩა სოფლის 151 დილერი, რომლებიც სოფლის/თემის ინტერესების დამცველნი და წარმომამდგენლები არიან ადგილობრივი თვითომმართველობის ორგანოებში. მათ ჩაუტარდათ ტრენინგები ლიდერის უნარ–ჩვევების გასავითრებლად. ასევე, თვითმმართველობების ათასამდე თანამშრომელს ჩაუტარდა ტრენინგი სხვადასხვა საკითხებზე; მოსახლეობასა და თვითმმართველობას შორის გაიმართა 100–ზე მეტი საჯარო შეხვედრა; მომზადდა გადაცემების ციკლი თვითმმართველობის საკითხებზე რეგიონალურ ტელევიზიებსა და რადიოში, გამოიცა წიგნები თვითმმართველობის თანამშრომლებისთვის და შეიქმნა ადგილობრივი საზოგადოებრივი დარბაზები, რომელთა შემადგენლობაშიც შედიან მოქალაქეები, სამოქალაქო სექტორის ან/და ბიზნესის წარმომადგენლები.
სამწლიანი პროექტის მთავარი მიზანი იყო თვითმმართველობის განვითარების ხელშეწყობა მის საქმიანობაში მოქალაქეთა ჩართულობის გზით. პროექტზე მომუშავე ადამიანები თვლიან, რომ სამი წლის შემდეგ პროექტის მთავარი შედეგი არის ის, რომ „ჩვენ გვყავს უფრო აქტიური, უფრო ინფორმირებული მოქალაქე, რომელიც თუნდაც პროექტის დაწყებამდე გვყავდა (…) რაც ყველაზე მთავარია, მოქალაქეებმა გაიაზრეს, რომ თვითმმართველობა – ეს თვითონ არიან, რომ თვითმმართველობა – ეს ჩვენ ვართ“ – ამბობს პროექტის მენეჯერი, გურანდა რომანაძე პროექტის ვიდეო ანგარიშში. შეხვედრაზე ასევე აჩვენეს პროექტის სამწლიანი საქმიანობისა და შედეგების ამსახველი ფილმი (ვიდეო ანგარიში) „თვითმმართველობა – ეს შენ ხარ“.